AWMSG yn cyhoeddi Adroddiad Blynyddol 2021–2022
Dysgwch am yr holl brosiectau y mae Grŵp Strategaeth Meddyginiaethau Cymru Gyfan (AWMSG) wedi bod yn gweithio arnynt trwy gydol 2021-2022 yn eu hadroddiad blynyddol diweddaraf, wedi’i lunio gan Ganolfan Therapiwteg a Thocsicoleg Cymru Gyfan (AWTTC).
Ynddo rydym yn tynnu sylw at yr allbynnau o’r naw cyfarfod AWMSG rhithwir a gynhaliwyd yn ystod y flwyddyn, gan gynnwys:
- 21 o feddyginiaethau wedi’u harfarnu (8 wedi’u cyflwyno llawn, 4 wedi’u cyflwyno’n rhannol a 9 estyniad trwydded pediatrig)
- 17 o Ddatganiadau Cyngor wedi’u cyhoeddi
- 14 o adnoddau optimeiddio meddyginiaethau wedi’u cyhoeddi
- 15 o ddangosyddion presgripsiynu cenedlaethol wedi’u monitro drwy gydol y flwyddyn
- 9 o Gynlluniau Mynediad i Gleifion Cymru wedi’u prosesu.
Mae’r adroddiad hefyd yn amlinellu’r gwaith pwysig mae AWMSG yn ei wneud gyda’r tri phrif grŵp partner – cleifion a’r cyhoedd, gweithwyr gofal iechyd proffesiynol a’r diwydiant fferyllol – wrth iddynt barhau i ymateb i heriau’r pandemig tra’n cefnogi presgripsiynu meddyginiaethau diogel a darbodus.
Mae hefyd yn adrodd ar gyflawniadau niferus AWMSG ac AWTTC dros y flwyddyn ddiwethaf, er gwaethaf anawsterau’r pandemig.
Dywedodd yr Athro Iolo Doull, Cadeirydd AWMSG: "Mae’r cyfnod rhwng 1 Ebrill 2021 a 31 Mawrth 2022 wedi bod yn heriol ond yn ddiddorol.
"Mae wedi bod yn galonogol gweld sut rydym wedi gallu addasu ein gwaith i ymateb i heriau pandemig byd-eang COVID-19 a’r gwydnwch a’r arloesedd a ddangoswyd gan yr holl staff sy’n gweithio yn GIG Cymru ac ym maes gofal cymdeithasol.
"Mae’r rôl ganolog y mae meddyginiaethau wedi’i chwarae trwy gydol y pandemig yn amlygu pwysigrwydd y gwaith y mae AWMSG a’i is-grwpiau, Grŵp Cynghori Cymru Gyfan ar Bresgripsiynu (AWPAG) a’r Grŵp Meddyginiaethau Newydd (NMG), yn ei wneud wrth gynghori Llywodraeth Cymru a chefnogi cydweithwyr gyda phresgripsiynu a rheoli meddyginiaethau.
"Mae’r gefnogaeth a ddarperir gan y tîm amlddisgyblaethol sy’n gweithio yn AWTTC, sydd wedi’i leoli yng Nghanolfan Academaidd Routledge yn Ysbyty Athrofaol Llandochau, wedi bod yn amhrisiadwy ac unigryw."