Mae tîm Sganio’r Gorwel a Rhagolygon Ariannol AWTTC yn darparu gwybodaeth gynnar am feddyginiaethau newydd i gefnogi gwaith cynllunio ariannol a gwasanaethau effeithiol a mynediad amserol at driniaethau ar draws y GIG yng Nghymru.
Mae’r tîm yn casglu gwybodaeth am feddyginiaethau newydd, defnydd newydd ar gyfer meddyginiaethau presennol, a fformwleiddiadau newydd sy’n cael eu datblygu. Rydym yn canolbwyntio ar y rhai y disgwylir iddynt gael eu trwyddedu a bod ar gael fel mater o drefn yn y DU yn y flwyddyn ariannol gyfredol a’r flwyddyn ariannol nesaf. Mae’r wybodaeth hon yn ein helpu i nodi a deall pa newidiadau i wasanaethau y gallai fod angen i fyrddau iechyd neu ymddiriedolaethau yng Nghymru eu gwneud er mwyn cynnig y meddyginiaethau hyn i gleifion, os yw NICE neu AWMSG yn argymell eu defnydd fel mater o drefn. Mae rhagolygon ariannol yn cysylltu â sganio’r gorwel i asesu effaith debygol meddyginiaethau newydd, defnydd newydd meddyginiaethau, a fformwleiddiadau newydd ar y gyllideb cyn iddynt ddechrau cael eu defnyddio fel mater o drefn. Y nod yw darparu amcangyfrifon cynnar o gostau, yn seiliedig ar dystiolaeth sydd ar gael, i gefnogi cynllunio ariannol yn lleol ac yn genedlaethol.
Defnyddir gwybodaeth a gesglir gan y tîm hefyd i gefnogi Proses Asesu Meddyginiaethau AWMSG ar gyfer Meddyginiaethau Trwyddedig ac Oddi ar y Label. Mae hyn yn cynnwys nodi meddyginiaethau newydd nad yw NICE yn disgwyl eu hasesu ond lle mae angen clinigol clir neu fudd arall i’r GIG yng Nghymru.
Mae’r tîm Sganio Gorwel a Rhagolygon Ariannol yn defnyddio ystod eang o ffynonellau i gasglu gwybodaeth am feddyginiaethau newydd, defnydd newydd meddyginiaethau, a fformwleiddiadau newydd. Mae AWTTC yn cefnogi ac yn ymgysylltu’n llawn â chronfa ddata sganio gorwel y DU gyfan UK PharmaScan. Mae holl sefydliadau sganio gorwel cenedlaethol y DU yn defnyddio UK PharmaScan a dyma brif ffynhonnell wybodaeth y tîm am feddyginiaethau sy’n cael eu datblygu. Rydym yn annog cwmnïau i gofrestru gyda UK PharmaScan a’i ddefnyddio i wneud yn siŵr y gall y GIG yng Nghymru gynllunio ar gyfer cyflwyno eu meddyginiaethau’n amserol. Gallwch ddysgu mwy am UK PharmaScan, gan gynnwys sut i gofrestru, ar wefan UK PharmaScan.
Caiff yr holl wybodaeth a gesglir gan y tîm ei storio’n ddiogel. Mae’r tîm yn ei defnyddio i gynhyrchu adroddiadau sganio gorwel cyfrinachol ar gyfer y GIG yng Nghymru. Mae AWTTC yn rhannu’r adroddiadau hyn, trwy storfa sganio gorwel ddiogel, gydag unigolion wedi’u henwi sy’n gweithio yn y GIG yng Nghymru sy’n gyfrifol am gynllunio ariannol a gwasanaethau meddyginiaethau. Mae mynediad at wybodaeth AWTTC yn gofyn am gytundeb cyfrinachedd wedi’i lofnodi.
Rydym yn gweithio’n agos gydag amrywiaeth o bartneriaid i adeiladu gwasanaeth sganio gorwel a rhagolygon ariannol cadarn, sy’n addas ar gyfer y dyfodol i Gymru. Trafodir meddyginiaethau canser newydd bob mis yng nghyfarfodydd Grŵp Cydweithredol Sganio Gorwel Triniaeth Gwrth-Ganser Systemig, sy’n cynnwys cynrychiolwyr o bob bwrdd iechyd a chanolfannau canser yng Nghymru a chydweithwyr o feysydd genomeg a phatholeg. Mae’r grŵp yn rhoi sgôr effaith ar y gwasanaeth i bob meddyginiaeth. Defnyddir y wybodaeth a ddarperir gan y grŵp gan dîm Sganio Gorwel a Rhagolygon Ariannol AWTTC i amcangyfrif effaith net y feddyginiaeth newydd ar y gyllideb. Mae gwaith ar y gweill i sefydlu proses debyg ar gyfer meddyginiaethau nad ydynt yn ganser.
Gan weithio gyda phartneriaid ledled Cymru, ein nod yw symleiddio prosesau cenedlaethol i wella effeithlonrwydd a galluogi mynediad amserol at feddyginiaethau newydd, yn enwedig y rhai sydd ag anghenion cyflenwi cymhleth.
Rydym yn defnyddio UK PharmaScan fel ein prif ffynhonnell ar gyfer gwybodaeth sganio gorwel; fodd bynnag, rydym hefyd yn annog cwmnïau i ymgysylltu’n gynnar, yn enwedig ar gyfer meddyginiaethau y disgwylir iddynt gael effaith sylweddol ar gyllidebau neu wasanaethau. Gall cwmnïau gysylltu â thîm Sganio Gorwelion a Rhagolygon Ariannol AWTTC drwy e-bostio awttc@wales.nhs.uk. Gellir rhannu gwybodaeth sy’n sensitif yn fasnachol gyda ni drwy AWTTC Vault, ein porth rhannu ffeiliau diogel.