Canllawiau Cymru Gyfan ar hyfforddiant ac addysg meddyginiaethau: ar gyfer gweithwyr cymorth ym maes iechyd a gofal cymdeithasol (ymgynghoriad)

Byddem yn croesawu eich sylwadau ar y ddogfen ddrafft o’r enw ‘Canllawiau Cymru Gyfan ar hyfforddiant ac addysg meddyginiaethau: ar gyfer gweithwyr cymorth ym maes iechyd a gofal cymdeithasol’ a’r ffurflen Asesiad o’r Effaith ar Gydraddoldeb ac Iechyd (EqHIA) gysylltiedig.

Datblygwyd y canllawiau hyn drwy gydweithio â phartneriaid ym maes iechyd a gofal cymdeithasol a’u nod yw darparu fframwaith ar gyfer cynllunio a chyflwyno hyfforddiant ac addysg i sicrhau bod pobl yn cael eu cefnogi i gymryd eu meddyginiaethau’n ddiogel ac yn effeithiol.

Mae cynulleidfa darged y canllawiau yn cynnwys, ond heb fod yn gyfyngedig i weithwyr cymorth ym maes iechyd a gofal cymdeithasol, rheolwyr, unigolion cyfrifol, byrddau iechyd/ymddiriedolaethau, awdurdodau lleol, nyrsys cofrestredig a gweithwyr gofal iechyd proffesiynol eraill sy’n gofalu am blant ac oedolion. Bwriad y canllawiau yw cefnogi nyrsys cofrestredig sy’n dirprwyo cyfrifoldebau gweinyddu meddyginiaethau i weithwyr cymorth a gellir eu defnyddio hefyd i gefnogi gofalwyr di-dâl, teuluoedd a sefydliadau trydydd sector i helpu unigolion i reoli eu meddyginiaethau yn ddiogel ac yn effeithiol.

Mae’r canllawiau hyn yn berthnasol ar draws lleoliadau gofal amrywiol gan gynnwys, ond heb fod yn gyfyngedig i wasanaethau cartrefi gofal, gwasanaethau llety diogel, gwasanaeth canolfan breswyl i deuluoedd, gwasanaethau cymorth cartref, ysbytai a lleoliadau cymunedol

Mae cefnogi pobl i gymryd eu meddyginiaethau’n gywir yn rhan bwysig o ofal, gan helpu i wella iechyd a lles wrth leihau camgymeriadau a gwastraff meddyginiaethau.

Mae’r ddogfen a’r ffurflen EqHIA gysylltiedig a’r ffurflen adborth i’w gweld isod.

Dyddiad cau: 10 Chwefror 2026