Adnoddau gabapentinoid Cymru Gyfan ar gyfer poen cronig (ymgynghoriad)

Byddem yn croesawu eich sylwadau ar y ddogfen ddrafft o'r enw All Wales gabapentinoid resources for chronic pain, a'r ffurflen Equality and Health Impact Assessment (EqHIA) gysylltiedig.

Mae gabapentinoidau yn cael eu rhagnodi fwyfwy ar gyfer ystod o gyflyrau poen, er gwaethaf tystiolaeth gyfyngedig iawn i gefnogi eu defnydd ac eithrio ar gyfer poen niwropathig. Mae pryder cynyddol hefyd ynghylch eu diogelwch a'r niwed sy'n gysylltiedig â'u defnydd, gan gynnwys cynnydd mewn marwolaethau lle mae pregabalin wedi'i gofnodi ar y dystysgrif farwolaeth yng Nghymru a chynnydd sylweddol mewn ymholiadau sy'n gysylltiedig â gabapentinoid i Uned Gwenwynau Cenedlaethol Cymru.

Mae'r corff cynyddol hwn o dystiolaeth, ynghyd ag amrywiad mewn arferion rhagnodi ledled Cymru, wedi tynnu sylw at yr angen am adnoddau i gefnogi defnydd diogel a phriodol o gabapentinoidau ar gyfer poen cronig. Mae Adnoddau gabapentinoid Cymru Gyfan ar gyfer poen cronig wedi'u datblygu trwy ymgysylltu'n helaeth â Thasglu Gabapentinoid Cymru Gyfan, grŵp amlddisgyblaethol o arbenigwyr poen, fferyllwyr, clinigwyr, meddygon teulu, ffisiotherapyddion ac arbenigwyr camddefnyddio sylweddau, gyda chynrychiolaeth o bob bwrdd iechyd yng Nghymru.

Mae pedwar pecyn adnoddau, y gellir eu defnyddio naill ai gyda'i gilydd neu ar wahân. Mae'r adnoddau'n darparu canllawiau i helpu i wneud penderfyniadau ar y cyd â chleifion, gan roi cyngor ymarferol ar ddefnyddio a dad-ragnodi gabapentinoidau'n briodol, a dulliau sy'n canolbwyntio ar y claf o reoli poen cronig. Maent wedi'u hanelu'n bennaf at weithwyr gofal iechyd proffesiynol sy'n gweithio mewn practisau meddygon teulu, gan gynnwys fferyllwyr sy'n cynnal adolygiadau meddyginiaethau strwythuredig, ond gallant hefyd fod yn ddefnyddiol i weithwyr gofal iechyd proffesiynol sy'n gweithio mewn lleoliadau arbenigol fel gwasanaethau poen, niwroleg, rhewmatoleg, orthopedeg, a gwasanaethau camddefnyddio sylweddau.

Mae'r ddogfen a'r ffurflen EqHIA gysylltiedig a'r ffurflen adborth i'w gweld isod.

Dyddiad cau: Dydd Mawrth 24 Chwefror 2026