16 Tachwedd 2026
Cynhaliwyd 51ain Gynhadledd UKMi ar 4–5 Tachwedd 2026 yng ngwesty’r Hilton Newcastle Gateshead, gan ddod â gweithwyr proffesiynol sy'n gweithio ym maes Gwybodaeth am Feddyginiaethau o bob cwr o'r DU ynghyd.
Mae'r gynhadledd flynyddol yn rhoi cyfle i fferyllwyr, technegwyr fferyllfa, arbenigwyr diogelwch meddyginiaethau a gweithwyr gofal iechyd proffesiynol eraill rannu arferion gorau, ymchwil, arloesedd a datblygiadau gwasanaeth.
Roedd cynrychiolaeth dda o Wasanaeth Cyngor ar Feddyginiaethau Cymru (WMAS), gydag aelodau’r tîm Anna Burgess, Alana Adams ac Oliver Cummings yn bresennol ochr yn ochr â chydweithwyr o ganolfannau cyngor ar feddyginiaethau eraill Cymru, gan gynnwys Hannah Dickson o Hywel Dda a Charlotte Hay o Betsi Cadwaladr.
Tynnodd y gynhadledd sylw at ehangder yr arbenigedd a'r arweinyddiaeth a ddangoswyd gan weithwyr proffesiynol gwybodaeth am feddyginiaethau Cymru. Fel cadeiryddion dau is-grŵp cenedlaethol UKMi, rhoddodd Charlotte Hay ac Anna Burgess y wybodaeth ddiweddaraf am waith y Grŵp Rheoli Ansawdd a Risg (QRMG) a'r Grŵp Cyfathrebu yn y drefn honno. Tynnodd eu cyflwyniadau sylw at gyflawniadau a datblygiadau allweddol yn ystod 2026, gan gynnwys lansio gwefan rhwydwaith newydd UKMi .
Rhoddwyd sylw i ymchwil ac arloesedd hefyd. Cyfrannodd Anna Burgess at sesiwn lawn a oedd yn archwilio'r risgiau a'r defnydd cyfrifol o ddeallusrwydd artiffisial (AI) mewn Gwybodaeth am Feddyginiaethau. Daeth cydnabyddiaeth bellach pan ddyfarnwyd y wobr gyntaf i Anna a Charlotte am y poster gorau am eu prosiect ymchwil cydweithredol â Phrifysgol Caerdydd, gan dynnu sylw at gyfraniad timau Cymru at werthuso technolegau digidol sy'n dod i'r amlwg mewn gofal iechyd.
Clywodd y cynrychiolwyr hefyd gyflwyniad ysbrydoledig gan Hannah Dickson, a gyfeiriodd at y rhan a chwaraeodd yn cefnogi claf â ffeibrosis systig i ymgymryd ag ymgais record byd i rwyfo ar draws Cefnfor yr Iwerydd. Dangosodd ei chyflwyniad y rôl bwysig y gall gwybodaeth am feddyginiaethau a chymorth arbenigol ei chwarae yn nhaith cleifion unigol.
Cydnabuwyd cydweithwyr WMAS hefyd am eu cyfraniadau at weithgareddau proffesiynol cenedlaethol. Cafodd Oliver Cummings ei ganmol am ei gyfraniad at Gymdeithas Technegwyr Fferyllfa'r DU (APTUK), tra chafodd Nia Sainsbury ei chydnabod am gynrychioli Cymru ar Bwyllgor Llyfr Fformiwlâu ar y Cyd, Llyfr Fformiwlâu Cenedlaethol Prydain (BNF).
Yn ogystal â'r cyflwyniadau llafar a'r gwobrau, arddangoswyd gweithgareddau ymchwil a datblygu gwasanaethau WMAS trwy nifer o bosteri, gan roi cyfle i'r cynrychiolwyr ddysgu mwy am y gwaith arloesol sy'n digwydd ledled Cymru.
Roedd y gynhadledd yn gyfle gwych i rannu dysgu, cryfhau rhwydweithiau proffesiynol ac arddangos cyfraniad sylweddol WMAS a gwasanaethau gwybodaeth am feddyginiaethau Cymru ar lefel genedlaethol.
Llongyfarchiadau i bob cydweithiwr a oedd yn cynrychioli Cymru ac yn arddangos arbenigedd, arloesedd ac ymroddiad timau gwybodaeth am feddyginiaethau Cymru.