AWTTC yn cynnal Diwrnod Ymgysylltu â Diwydiant
18 Mai 2026
Cynhaliodd AWTTC Ddiwrnod Ymgysylltu â'r diwydiant fferyllol yng Nghaerdydd ddydd Iau, 30 Ebrill.
Nod y digwyddiad oedd cryfhau'r cydweithio rhwng AWTTC a'r diwydiant fferyllol ac annog deialog gynnar ynghylch meddyginiaethau newydd a threfniadau masnachol sy'n gysylltiedig â chanllawiau gwerthuso technoleg NICE ac AWMSG. Roedd agenda lawn yn tynnu sylw at wahanol agweddau ar ddatblygiadau a heriau i fynediad at feddyginiaethau yng Nghymru ac roedd digon o gyfle ar gyfer trafodaethau a chwestiynau wyneb yn wyneb.
Agorodd y diwrnod gyda chroeso gan Gyfarwyddwr Rhaglen AWTTC, Dr Andy Champion, a osododd y naws drwy bwysleisio pwysigrwydd ymgysylltu tryloyw ac effeithiol rhwng rhanddeiliaid. Dilynwyd hyn gan sesiwn ar y cyd â Maggie Clark, Pennaeth Polisi Mynediad a Mabwysiadu - Cenhedloedd Datganoledig ar gyfer Cymdeithas Diwydiant Fferyllol Prydain (ABPI), a groesawodd y dull cydweithredol yr oedd AWTTC wedi'i fabwysiadu ar gyfer eu gwaith o gyflawni Rhaglen Fuddsoddi VPAG yng Nghymru.
Thema allweddol drwy gydol y bore oedd disgwyl a pharatoi. Gwnaeth arweinydd sganio’r gorwel AWTTC, Claire Ganderton, amlinellu sut mae'r sefydliad yn nodi therapïau sy'n dod i'r amlwg yn gynharach, gan ganiatáu cynllunio gwell a mabwysiadu triniaethau arloesol yn gyflymach. Cafodd y dull blaengar hwn ei atgyfnerthu yn y sesiwn ar y cyd a gyflwynwyd gan yr Uned Gwerth Meddyginiaethau (MVU) a Thîm Mynediad at Feddyginiaethau Masnachol (CMAT) AWTTC a gyflwynodd ar “pam, pryd a sut” i gael deialog gynnar ar yr agweddau masnachol ar unrhyw ganllawiau gwerthuso technoleg newydd gan NICE neu AWMSG.
Amlygodd y cyflwyniad sut mae'r Uned Gwerth Meddyginiaethau (MVU) yn ategu gwaith AWTTC drwy gyflymu’r broses o fabwysiadu meddyginiaethau costeffeithiol, rheoli cytundebau masnachol, a gwneud y mwyaf o ragnodi yn seiliedig ar werth ar draws GIG Cymru.
Roedd y persbectif o'r tu allan i'r GIG yn rhan allweddol o'r rhaglen. Cynigiodd Simon Greatrix, o Pfizer, safbwynt y diwydiant ar werth ymgysylltu cynnar a rheolaidd â thîm CMAT, gan bwysleisio manteision i'r ddwy ochr o ddeialog gynnar ac amcanion a rennir i alluogi mynediad amserol at feddyginiaethau.
I orffen sesiwn y bore, nododd Uwch Fferyllydd AWTTC, Gail Woodland, effaith y newidiadau diweddar i brosesau asesu meddyginiaethau o fewn GIG Cymru. Tynnodd sylw at ddiweddariadau allweddol sydd â'r nod o wella effeithlonrwydd a thryloywder prosesau i alluogi dull gwneud penderfyniadau ar gyfer meddyginiaethau trwyddedig ac all-drwydded lle mae'r ymgyrch am gyngor yn seiliedig ar angen clinigol.
Dechreuodd y prynhawn gyda diweddariad gan Dr Steph Francis ar waith AWTTC i gefnogi’r broses o gyflwyno llwybrau cymhleth o fewn GIG Cymru, gan archwilio'r heriau o ddod â thriniaethau arloesol o fewn strwythurau gofal iechyd presennol. Dilynwyd hyn gan gyfres o sesiynau rhyngweithiol gyda chyfle i drafod a chwestiynu mewn grwpiau bach. Roedd y pynciau'n cynnwys gweithredu, asesu meddyginiaethau, sganio'r gorwel, a defnyddio data. Cynigiodd y trafodaethau grŵp llai hyn gyfle ar gyfer cyfnewidiadau mwy anffurfiol a manwl rhwng cynrychiolwyr a chydweithwyr AWTTC.
Daeth y digwyddiad i ben gyda chrynodeb gan Dr Champion, a fyfyriodd ar drafodaethau'r diwrnod ac a ailadroddodd ymrwymiad AWTTC i gynnal ac adeiladu ar eu cydberthnasau gwaith rhagorol a hirsefydlog gyda diwydiant a ddatblygwyd dros nifer o flynyddoedd ers sefydlu Grŵp Strategaeth Meddyginiaethau Cymru Gyfan yn ôl yn 2002.