Y Cynllun Gwirfoddol ar gyfer Rhaglen Prisio, Mynediad a Thwf Meddyginiaethau Brand (VPAG)

Cefndir

Mae'r Cynllun Gwirfoddol ar gyfer Prisio Meddyginiaethau wedi’u Brandio, Mynediad a Thwf (VPAG) yn gytundeb rhwng Llywodraeth y DU a Chymdeithas Diwydiant Fferyllol Prydain (ABPI), sy'n rhedeg o 2024 i 2028. O dan y cynllun hwn, mae tua £400 miliwn yn mynd tuag at Raglen Fuddsoddi nodedig VPAG. Mae'r rhaglen hon yn darparu buddsoddiadau ar draws pedair gwlad y DU i gyflymu arloesedd, gwella mynediad cleifion at feddyginiaethau, a chryfhau arweinyddiaeth fyd-eang y DU mewn technoleg iechyd a gwyddorau bywyd.

Mae Canolfan Therapiwteg a Thocsicoleg Cymru Gyfan (AWTTC) yn arwain y gwaith o gyflwyno rhaglen Asesiad Technoleg Iechyd (HTA) Rhaglen Fuddsoddi VPAG yng Nghymru. Nod y rhaglen genedlaethol hon yw sicrhau bod cleifion yng Nghymru yn elwa ar fynediad cyflymach at driniaethau newydd ac effeithiol, gan gefnogi'r GIG i wneud penderfyniadau gwybodus a chynaliadwy am feddyginiaethau.

Llywodraethu’r Rhaglen

Mae HTA Bwrdd Rhaglen Fuddsoddi VPAG (Cymru)  yn darparu arweinyddiaeth a goruchwyliaeth strategol. Gan adrodd yn uniongyrchol i Fwrdd Rhaglen Fuddsoddi VPAG y DU, mae Bwrdd Cymru yn sicrhau bod pob menter yn cyd-fynd ag amcanion ledled y DU wrth ddiwallu anghenion penodol GIG Cymru.

Mae Swyddfa Rheoli Rhaglenni bwrpasol yn cydlynu'r ddarpariaeth drwy bedwar prosiect cydgysylltiedig:

• Sganio'r gorwel a rhagolygon ariannol
• Ecosystem meddyginiaethau
• Gweithredu
• Datgloi data

Sganio'r gorwel a rhagolygon ariannol

Paratoi Cymru ar gyfer meddyginiaethau'r dyfodol

Mae'r prosiect hwn yn datblygu  gwasanaeth sganio’r gorwel 'unwaith i Gymru', gan ddarparu gwybodaeth gynnar am feddyginiaethau a thechnolegau newydd sy'n cael eu datblygu. Drwy gydweithio â phartneriaid yn y DU fel UKPharmaScan a NICE, bydd y gwasanaeth yn:

• Nodi triniaethau newydd i helpu'r GIG i gynllunio a pharatoi'n effeithiol.
• Darparu gwybodaeth amser real o ansawdd uchel ar gyfer cynllunio ariannol a chynllunio gwasanaethau'r GIG yng Nghymru.
• Cefnogi mynediad amserol at feddyginiaethau arloesol i gleifion yng Nghymru.
• Cynnal adolygiadau wedi'u targedu o feddyginiaethau effaith uchel i gefnogi’r gwaith o gynllunio systemau’r GIG.

Ecosystem meddyginiaethau

Ailgynllunio sut mae meddyginiaethau'n cael eu hasesu a'u cyrchu yng Nghymru

Nod y prosiect hwn yw trawsnewid y ffordd y mae GIG Cymru yn gwerthuso meddyginiaethau newydd, gan sicrhau mynediad teg, cyson, ac yn seiliedig ar dystiolaeth.
Bydd yn:     

• Adolygu a moderneiddio'r Broses Asesu Meddyginiaethau yng Nghymru.
• Datblygu Ecosystem Meddyginiaethau newydd, gyda meini prawf cynhwysiant wedi'u diweddaru ar gyfer asesu a Phanel Craffu newydd.
• Hyrwyddo mynediad teg at feddyginiaethau sy'n effeithiol yn glinigol ac yn gost-effeithiol.
• Cryfhau cydweithrediad â mentrau'r DU fel Labordy Arloesi HTA NICE  a Llwybr Trwyddedu a Mynediad Arloesol (ILAP).  

Gweithredu

Pontio arloesedd ac ymarfer clinigol

Mae'r prosiect hwn yn canolbwyntio ar sicrhau bod meddyginiaethau newydd sydd wedi'u cymeradwyo i'w defnyddio yn cael eu defnyddio'n effeithiol ac yn gyson ar draws GIG Cymru. Mae'r blaenoriaethau allweddol yn cynnwys:

• Gwella’r gefnogaeth i fanteisio ar y meddyginiaethau yn dilyn asesiad.
• Gweithredu o fewn llwybrau meddyginiaeth cymhleth. Cryfhau dulliau llywodraethu a thryloywder ar gyfer meddyginiaethau cost uchel drwy raglen Blueteq .
• Hwyluso mynediad at drefniadau masnachol drwy'r Tîm Mynediad at Feddyginiaethau Masnachol (CMAT)  a Grŵp Cynllun Trefniadau Masnachol Cymru (CASWG).

Datgloi data

Troi data yn benderfyniadau

Mae datgloi potensial llawn data yn hanfodol i wella mynediad at feddyginiaethau ac i wella canlyniadau cleifion. Mae'r prosiect hwn yn arwain y broses o wneud penderfyniadau sy'n seiliedig ar ddata drwy:

• Ddatgloi a chysylltu setiau data, mewn cydweithrediad ag Iechyd a Gofal Digidol Cymru (DHCW) a phartneriaid eraill, i gynhyrchu mewnwelediadau ystyrlon i batrymau rhagnodi a chanlyniadau cleifion, er mwyn lleihau amrywiad diangen.
• Cynyddu gwerth rhaglenni fel Blueteq i sicrhau mynediad amserol a chyfartal at feddyginiaethau newydd i gleifion yng Nghymru.
• Creu offer arloesol i gasglu, delweddu a dadansoddi data, gan gefnogi dulliau rhagnodi mwy diogel, effeithlon ac effeithiol.
• Archwilio dadansoddeg well i gefnogi dulliau cynllunio a’r defnydd gorau posibl o feddyginiaethau ledled Cymru.

Cysylltwch â ni yn awttc@wales.nhs.uk os hoffech gael rhagor o wybodaeth am Raglen VPAG.