Fel yr adroddwyd yn flaenorol, dyfarnwyd cyllid i AWTTC i gyflawni amrywiaeth o fentrau drwy'r cynllun gwirfoddol ar gyfer prisio, mynediad a thwf meddyginiaethau wedi’u brandio (VPAG).
Cytunwyd ar y cynllun gan Lywodraeth y DU a Chymdeithas Diwydiant Fferyllol Prydain (ABPI) ym mis Tachwedd 2023. Fel rhan o'r cytundeb hwn, mae'r diwydiant fferyllol yn gwneud buddsoddiad ychwanegol o £400 miliwn mewn gwyddorau bywyd dros bum mlynedd drwy Raglen Fuddsoddi VPAG, a fydd yn cyflymu gwaith ar dreialon clinigol, gweithgynhyrchu ac asesu technoleg iechyd (HTA).
Nod VPAG yw galluogi cleifion i gael mynediad at y triniaethau arloesol diweddaraf, cryfhau safle'r DU mewn arloesedd gofal iechyd byd-eang ac ymchwil glinigol, ac yn y pen draw sicrhau canlyniadau iechyd gwell ar draws y boblogaeth.
Yn unol â'r dyfarniad cyllido, mae AWTTC wedi sefydlu pedwar prosiect craidd:
• Sganio'r Gorwel a Rhagolygon Ariannol
• Ecosystem Meddyginiaethau (asesiad meddyginiaethau)
• Gweithredu (cefnogi'r defnydd o feddyginiaethau a aseswyd)
• Datgloi Data (gwella mynediad, ansawdd a chysylltu data iechyd)
Yn ogystal â rheolwr rhaglen, mae amrywiaeth o swyddi tymor penodol wedi cael eu recriwtio i gefnogi’r gwaith o gyflawni amcanion y rhaglen, fel y nodir isod, gyda dechreuwyr newydd yn cynefino ar hyn o bryd.
Yn ei chyfnod adrodd cyntaf, bydd y rhaglen yn canolbwyntio ar gyflawni ystod o feysydd blaenoriaeth allweddol gan gynnwys cynefino, hyfforddi a sefydlu staff newydd. Cynhelir bwrdd cyntaf y rhaglen ym mis Medi lle bydd aelodau'n cymeradwyo cyflawniadau, amcanion ac amserlen y rhaglen.